POST 4 : TAKDEER PAR IMAAN PART ll

Aur farmaya:

Agar unka iraada'h jihaad ke liye nikalne ka hota toh wah is safar ke liye saamaan ki taiyari kar rakhte lekin Allah ko unka uthna pasand hi na tha isliye unhein harkat se hi rok diya aur kah diya gaya ke tum baithne waalo'n ke saath baithe hi raho. (46)
Surah Tauba'h...

Pehli aayat mein aane ko bande ki mosayyat ke saath aur dusri aayat mein taiyari ko us ke iraade par mo'qoof rakha hai...
Bande ko Allah ne aoamr wa nawahi ka mukallif theraya, agar uske paas ekhtiyar wa qudrat na hote toh yeh taqleef malaytaaq hoti, aur yeh ek aisi baat hai jo Allah ki hikmat, rehmat aur uski taraf se mo'sool hone waali sachchi khabar ke munaafi hai, jabke uska farmaan hai:

Allah ta'ala kisi jaan ko uski taaqat se zyada takleef nahin deta, jo neki wah kare wah uske liye aur jo burayi wah kare wah us par hai, aye humare rab! Agar hum bhool gaye ho'n ya khata ki ho toh humein na pakadna, aye humare rab! Hum par wah bojh na daal jo hum se pehle logo'n par daala tha, aye humare rab! Hum par wah bojh na daal jiski humein taaqat na ho aur hum se darguzar farma! Aur humein bakhsh de aur hum par raham kar! Tu hi humara maalik hai, humein kafiro'n ki qaum par ghalba ata farma. (286)
Surah Al-Baqrah...

Neko kaar ki neki par satayesh, badkar ki badkari par muzammat aur dono ko unke hisaab istahqaaq badle ka vaada bhi is baat ki daleel hai ke banda'h majboor nahin, balke mukhtar hai...

Agar bande ka fa'al uske ekhtiyar aur iraade se saadir na hota ho toh nekokaar ki mada'h sarayi fazool aur bure ki saza us par zulm hai, aur Allah ta'ala fazool kaamo'n aur zulm se paak hai...

Allah ta'ala ne Rasool maboos farmaye jinka maqsad yeh hai ke:

Humne unhein Rasool banaya hai,
khushkhabriya'n sunane waale aur aagaah karne waale taake logo'n ki koi hujjat aur ilzaam Rasoolo'n ke bhejne ke baad Allah ta'ala par rah na jaaye. Allah ta'ala bada ghaalib aur bada baa hikmat hai. (165)
Surah An-Nisa...
...
Aur agar bande ka amal uske ekhtiyar wa iraada'h mein na hota toh Rasool bhejne se uski hujjat baatil na hoti...

Har kaam karne waala shaks kaam karte ya use chhodte waqt apne aap ko har tarah ke jabr wa akraah se aazad mehsoos karta hai...

Insaan mahaz apne iraada'h se uthta, baithta, aata, jaata aur safar wa hazar ekhtiyar karta hai, use koi sha'oor wa ehsaas nahin hota ke koi use is par majboor kar raha hai, balke fi alwakey wah un amor mein jo apne ekhtiyar se ya kisi ke majboor karne se karta hai farq kar sakta hai, use hi shariyat ne bhi ehkaam wa aitbaar se un dono'n qasam ke af'aal wa amaal mein farq kiya hai...

Chunancha insaan haqooq Allah se muta'aliq jo kaam majboor ho kar kar guzre us par koi mo'aakhza'h nahin hai...

Humara aqeedah hai ke gunaahgaar ko apni ma'asiyat par taqdeer se hujjat pakadne ka koi haq nahin hai, kyon ki wah ma'asiyat ka ekdaam karte waqt baa ekhtiyar hota hai aur use iske muta'aliq koi ilm nahin hota kd Allah ne us ke liye yahi muqaddar kar rakha hai, kyon ki kisi amr ke wakey hone se qabal toh Allah ki taqdeer ko koi nahin jaan sakta...

Beshaq Allah ta'ala hi ke paas qayamat ka ilm hai wahi baarish naazil farmata hai aur maa ke pet mein jo hai use jaanta hai. Koi (bhi) nahin jaanta ke kal kya (kuchh) karega? Na kisi ko yeh maloom hai ke kis zameen mein marega. (yaad rakho) Allah ta'ala hi pure ilm waala aur sahih khabro'n waala hai. (34)
Surah Luqmaan...
...
Phir jab insaan koi ekdaam karte waqt ek hujjat ko jaanta hi nahin toh phir a'zr pesh karte waqt us se daleel kyon kar pakad sakta hai? Aur bilashaq Allah ta'ala ne us hujjat ko baatil qaraar diya hai, farmaya:

Yeh mushrakin (yun) kaheinge ke agar Allah ta'ala ko manzoor hota toh na hum shirk karte aur na humare baap daada aur na hum kisi cheez ko haraam kah sakte. Isi tarah jo log inse pehle ho chuke hain
unhone bhi takzeb ki thi yahan tak ke unho'n ne humare a'zaab ka mazaa chakha. Aap kahe ke kya tumhare paas koi daleel hai toh us ko humare rubaru zaahir karo. Tum log mahaz khayali baato'n par chalte ho aur tum bilkul atkal se baatein banate ho. (148)
Surah Al-An'aam...